އެފްއޭއެމްގެ ޓެކްނިކަލް ޑައިރެކްޓާ އިންގްލެންޑް ޕޯލް ތޯމަސް ސްމޯލީ، ޑިސެމްބަރު މަހު ވޯލްޑް ސޮކާ އަށް ދިން އިންޓަވިއުގައި ވަނީ މި އަހަރުގެ ފުރަތަމަ ކުއާޓާގައި އޭނާ ހާސިލުކުރަން ބޭނުންވާ ކަންތައްތަކެއް ކަނޑައަޅައިފަ އެވެ.
“އަހަރުގެ ފުރަތަމަ ކުއާޓާގެ ކޮންމެ ވެސް ހިސާބެއްގައި ދެކުނާއި އުތުރު އަދި މެދުރާއްޖެ ހިމޭނެ ގޮތަށް ލީގު ފަށަން ޖެހޭ،” އިންޓަވިއުގައި ސްމޯލީ ބުންޏެވެ.
ފުރަތަމަ ކުއާޓާ ނިމި، ދެވަނަ ކުއާޓާ ފެށިގެން މިއޮއް ދަނީ އެވެ. އުތުރާއި ދެކުނު އަދި މެދުރާއްޖޭގެ ލީގު ވާހަކަ ބާއްވާށެވެ. މައި ލީގު، ދިވެހި ލީގު ވެސް ފެށޭނެ ތާރީހެއް އަދި ވެސް ނޭނގެ އެވެ.
ފުރަތަމަ ކުއާޓާ އށް ސްމޯލީ ކަނޑައެޅި އަނެއް ޓާގެޓަކީ، ފެބްރުއަރީ މަހު ގައުމީ ޓީމަށް ބިދޭސީ ކޯޗެއް ހަމަޖައްސައި، މިދިޔަ މަހުގެ އިންޓަނޭޝަނަލް ބްރޭކުގެ ބޭނުން ރާއްޖެއިން ހިފުމަށް ވެސް ޓާގެޓް އޭނާ ގެންގުޅުނެވެ. އެކަމަކު އެއިން އެއް ކަމެއް ވެސް ނުވެ، އެ ކުއާޓާ ސްމޯލީ ނިންމާލީ އަތް އުރާލައިގެން ހުރެ އެވެ.
ބަންގްލަދޭޝްގެ ކުރީގެ ޓެކްނިކަލް ޑައިރެކްޓަރު، ސްމޯލީ ވަނީ އެ ގައުމުގައި ރަނގަޅު މަސައްކަތްތަކެއް ކޮށްފަ އެވެ. ފުޓްބޯޅަ ސްކޫލެއް ފަށާއި އުމުރުން ހަގު ކުޅުންތެރިން ރެކްރޫޓް ކުރާނެ ރަނގަޅު ނިޒާމެއް އެ ގައުމުގައި އޭނާ އެކުލަވާލި އެވެ.
ނަމަވެސް، ރާއްޖޭގެ މަގާމަށް އޭނާ އައްޔަން ކުރިތާ ނުވަ މަސް ވީއިރު ވެސް އޭނާ މަސައްކަތް ކުރާނެ މާހައުލެއް އެފްއޭއެމްގެ ލިޑާޝިޕަކަށް ހޯދައެއް ނުދެވުނެވެ.
އޭގެ ބަދަލުގައި އެފްއޭއެމް އޮތީ ބޮޑު މައްސަލަ ގަނޑެއްގެ ތެރެއަށް ވެއްޓިފަ އެވެ. ވެރިންގެ މައްޗަށް އޮތީ ހިޔާނާތުގެ ތުހުމަތުތައް ކުރެވިފަ އެވެ. ފީފާއިން ދޭ، ޑިވެލޮޕްމެންޓް ބަޖެޓް އޮތީ ހިފަހައްޓައިފަ އެވެ. އާ އިންތިހާބެއް ބާއްވަން ދެ ފަހަރު އިއުލާން ކުރުމުން ވެސް ފީފާއިން އެކަން ހުއްޓުވައިފި އެވެ.
ކުރިން އެފްއޭއެމްގައި މަސައްކަތް ކުރި ބޭފުޅަކު ވިދާޅުވީ، ލީޑާޝިޕާއި އިންތިހާބާ މެދު ގޮންޖެހުންތަކެއް ހުއްޓަސް ފުޓްބޯޅަ ޑިވެލޮޕްމެންޓަށް ހިންގާ މަސައްކަތް ހުއްޓިގެން ނުވާނެ އެވެ.
“އެކްސްކޯގެ ވާހަކަ ބާއްވާ. އެކަމަކު ރަނގަޅު ސިސްޓަމެއް އެކަށައަޅައިފައި އޮތް ނަމަ ޓެކްނިކަލް މަސައްކަތް ހުއްޓާ ނުލާ ގެންދެވޭނެ. އިންޓަނޭޝަނަލް ބްރޭކްގައި ގައުމީ ޓީމަށް މެޗު ވެސް ކުޅެވޭނެ،” އޭނާ ބުންޏެވެ.
“ހަރުދަނާ ސިސްޓަމެއް ނެތީމަ އެކްސްކޯ އަށް ތުހުމަތެއް ކުރެވޭ އިރަށް ވެސް ޓެކްނިކަލް މަސައްކަތް ހުއްޓެން ޖެހެނީ.”
އޭނާ ވިދާޅުވީ، ކިތަންމެ މޮޅު މީހަކު ރާއްޖެ ޓެކްނިކަލް ޑައިރެކްޓަރުކަމަށް އަޔަސް ކޯޗުކަމަށް އަޔަސް މިހާރު ސިސްޓަމް އޮތް ގޮތުން އެ މީހަކު ވެސް ހުންނަން ޖެހޭނީ އަތް އުރާލައިގެން ކަމަށެވެ.
އޮލިމްޕިކް ކޮމިޓީގެ ކުރީގެ ޖެނަރަލް ސެކެރެޓަރީ އަހްމަދު މަރުގޫޒގް ވެސް ކުރިން ވިދާޅުވެފައި ވަނީ ރާއްޖޭގެ ކޯޗު ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ގެނެޔަސް ވާނީ ފެއިލް ކަމަށެވެ.
އެފްއޭއެމްގައި މިހާރުގެ ރައީސް ބައްސާމް އަދީލް ޖަލީލް ހޭދައްކުރައްވާތާ މިހާރު ނުވަ އަހަރު ވެއްޖެ އެވެ. އެކަމަކު ހަރުދަނާ ނިޒާމެއް އޭނާ އަށް ނުހެދުނެވެ.
މިހާރު އޮތް ތާށި ހާލަތުގައި އެފްއޭއެމުން ވަނީ ޓެކްނިކަލް ގިނަ މަގާމުތަކަށް މީހުން ހޯދަން އިއުލާންކޮށްފަ އެވެ. އޭގެ ތެރޭގައި ގައުމީ އަންހެން އަދި ފިރިހެން ސީނިއާ ދެ ޓީމަށް ކޯޗުން ހޯދަން ވެސް އޮތީ އިއުލާންކޮށްފަ އެވެ.